Síðastliðinn föstudag, 28. maí var Grænfánahátíð í skólanum í tilefni af því að þá fengum við Grænfánann afhentan í annað sinn til tveggja ára. Nemendur og starfsfólk skólans í Ólafsvík fóru í skrúðgöngu í tilefni dagsins en 7. og 8. bekkingar höfðu útbúið borða fyrir alla nemendur skólans með því að skrifa á þá ýmis hvetjandi orð sem tengdust umhverfisvernd, þessa borða báru nemendur í skrúðgöngunni.
Fyrir skrúðgöngunni fóru nemendur í 8. bekk. Fánaberar voru þeir Steinþór Stefánsson og Ólafur Páll Kristjánsson sem héldu á Grænfánanum og Snæfellsbæjarfánaum auk þess sem Benedikt G. Jensson og Hafþór I. Jónsson skiptust á að slá taktinn á trommu. Veðrið lék við okkur í göngunni og gáfu nemendur borðana sína þeim sem á vegi þeirra urðu og fóru einnig inn í fyrirtæki með þá. Vonandi höfum við með því náð að vekja einhverja til umhugsunar um umhverfisvernd.
Þegar komið var aftur í skólann settust nemendur í brekkuna úti á skólalóðinni og svo hófst formleg afhending Grænfánans. Magnús skólastjóri stjórnaði samkomunni en til okkar voru komnir góðir gestir að sunnan, þau Hrefna Sigurjónsdóttir líffræðingur sem er stjórnarkona í Landvernd og Guðbjartur Hannesson þingmaður og formaður fjárlaganefndar. Áður en afhendingin fór fram sungu nemendur skólans lagið "Nú er sumar" undir stjórn Lilju og Sigga sem spilaði á gítar. Því næst ávarpaði Hrefna viðstadda og afhenti skjal því til staðfestingar að við höfum hlotið Grænfánann öðru sinni og tók Svanborg við skjalinu. Að því loknu voru nemendur sem setið hafa í umhverfisnefnd þetta skólaár kallaðir upp og afhenti Guðbjartur þeim fánann, krakkarnir aðstoðuðu því næst Togga húsvörð við að draga fánann að húni.
Að lokum afhenti Azra Crnac, fyrir hönd umhverfisnefndarinnar í vetur, þeim Hrefnu og Guðbjarti gjafir frá okkur en það voru margnota innkaupapokar sem nemendur unnu í vetur upp úr gömlum gallafatnaði.
Hátíðin tókst í alla staði mjög vel og ekki spillti fyrir að vera úti í góðu veðri eins og var þennan dag. Einnig var gleðilegt að sjá hve margir gestir voru mættir til að fylgjast með. Í framhaldi af afhendingunni var opnuð vorsýning skólans á vinnu nemenda en í tilefni dagsins var nemendum boðið upp á skúffuköku sem þau höfðu sjálf bakað.
