Nú um áramót fengu skólarnir í Snæfellsbæ styrk úr Sprotasjóði Menntamálaráðuneytisins til verkefnisins „Átthagafræði í skólum Snæfellsbæjar“. Styrknum er ætlað að styðja uppbyggingu átthagafræði í skólunum, með sérstakri áherslu á upplifun nemenda og aukinni samvinnu milli skólastofnana.
Segja má að hugmyndin að verkefninu hafi kviknað í framhaldi af vinnu við skólastefnu Snæfellsbæjar. Í þeirri vinnu var lögð mikil áhersla á að nám í skólunum taki ríkulega mið af heimabyggð sinni á sem víðastan máta. Forvinna við umsóknina var í höndum skólastjórnendanna sem gengu frá umsókn í nóvember þar sem tilgreind voru markmið með verkefninu og tímaáætlun.
Í febrúar var svo skipað í þverfaglegt teymi með fulltrúum grunnskólanna, leikskólanna og tónlistarskólans og verður verkefnastjórnin í þeirra höndum.
Átthagafræði á sér langa sögu í íslensku skólakerfi, en þó með viðkomu í mörgum námsgreinum og á mismunandi aldri. Fyrsta verkefni skólanna er að taka saman það sem verið er að gera og tengist heimabyggðinni okkar. Er þar bæði verið að tala um bókleg verkefni á hefðbundinn máta, en einnig upplifun eins og t.d. vettvangsheimsóknir hvers konar eða þátttaka í verkefnum eins og matjurtargarði eða tiltekt á skólalóð.
