Skólaárið 2011-2012 hófst með krafti hjá Umhverfisnefndinni. Búið er að halda tvo fundi með fulltrúum bekkjanna og farið yfir merkingar í skólastofum og á vinnusvæðum viðsvegar um skólann. Þetta eru merkingar á borð við „spörum rafmagnið“, vatnið og sápuna. Mikilvægt er að halda áfram að reyna að gera vel og fá nemendur til að sýna ábyrgð og samstöðu í umhverfismálum skólans. Jafnframt var farið yfir reglur um flokkun á rusli og könnuðu nemendur hvort ekki væru til staðar kassar fyrir flokkun á blöðum og pappír á þeim stöðum sem þeirra er þörf.
Í desember s.l. voru fest kaup á útiskúr til að geyma verkfæri skólans sem nemendur nota við plöntun og aðra útikennslu. Endanleg ákvörðun um staðsetningu og uppsetning skúrsins verður frmkvæmd á vordögum. Skúrinn á að aðvelda bæði nemendum og starfsfólki aðgengi að verkfærum og þeirra gagna sem nota á við útikennslu.
Ákveðið hefur verið að vinna áfram að nýjum Grænfána og endurnýjun á honum vorið 2012. Unnið verður áfram að þeim markmiðum sem ligga fyrir og nýjum markmiðum bætt við. Skolun einnota drykkjarumbúða og plástíláta er enn í gangi en til stendur að hætta þeirri vinnu um áramót. Á nýju ári hefur skólinn einsett sér að minnka sorphirðukostnað og ætlum við að draga úr sorpi sem hlýst af einnota umbúðum. Því hefur verið ákveðið að banna að nemendur komi með einnota umbúðir í skólann. Ef nemendur koma með slíkar umbúðir, þá þurfa þær að fara heim aftur.
Grunnskólinn og Skógræktarfélag Ólafsvíkur hefur hafið samstarf og verið er að vinna að skipulagi á verkefnum sem vinna á að í samstarfi við Skógræktarfélagið. Þann 12. desember s.l. var haldinn fundur með fulltrúm Snæfellsbæjar, Skógræktarfélagsins og Grunnskólans. Fundurinn gekk vel og lofar góðu um framhaldið. Með samstarfinu er hægt að tengja enn betur saman umhverfisstarfið og nýja námskrá skólans í Átthagafræði. Vinnan er á frumstigi og er þetta langtíma markmið sem þarf að þróa. Mikil vinna liggur í undirbúningi og skipulagi á svæði sem nota á undir óhefðbundna kennslu.
Umhverfisnefndin
